Jamita Minggu Quasimodogeniti, 16 April 2023. Marparange Hombar Tu Hata Ni Debata (Hesekiel 36: 22 - 27)

Jamita Minggu Quasimodogeniti, 16 April 2023

Ditubuhon Paduahalihon Marhite Hata ni Debata

Evangelium: Hesekiel 36: 22 - 27

 I. Patujolo

Hesekiel, sahalak sian tolu Panurirang Bolon di Padan Na Robi (dua nari: Jesaya dohot Jeremia) dohot tarbuang tu Babel di taon 597 SM. Mangihuthon angka pande bisuk rap do ibana dohot si Daniel di habuangan alai jumolo do si Daniel disi i ma di taon 605 SM. Tarbarita do si Daniel di Babel songon halak na bisuk manurirangi ala ni pola tolu hali si Hesekiel manurathon taringot tu ibana (Hes. 14: 14, 20; 28:3) Marhasohotan do ianggo Hesekiel (Hes. 24: 15-18) jala mangolu rap dohot angka buangan (Hes. 1:1; 3: 15, 24), alai ianggo si Daniel ndang mar hasohotan jala maringanan di lingkungan istana. Buku Panurirang Hesekiel marisihon tolu panurirangon bolon, i ma:

 1. Bindu 1-24: Panurirangon sorimago (nubuat penghukuman) tu bangso Israel.

 2. Bindu 25-32: Panurirangon sorimago (nubuat penghukuman) tu angka bangso.

 3. Bindu 33-48: Panurirangon panghirimon tu bangso Israel.

Jamita di Minggu Quasimodogeniti on masuk ma tu horong na patoluhon, i ma panurirangon panghirimon tu bangso Israel i ma na marisihon bagabaga hamumulak ni bangso Israel tu Jerusalem.

 

 II. HATORANGAN NI TURPUK

Ayat 22-24: Debata pabadiahon goarNa marhite mamboan mulak bangso Israel sian habuangan

Di Babel do bangso Israel songon halak buangan ala ni ndang adong hak politik nasida, secara ekonomi marsingkor jala secara sosial tertindas. Alai na jumorbut sian i, i ma secara partondion mago ma identitas nasida songon bangso ni Debata ai nunga marongso Bagas Joro na di Jerusalem. Pangantusion uju i, molo talu sada bangso, talu ma nang debata nasida. Ala talu bangso Israel maralohon Babel, pangantusion ni angka bangso na humaliang talu ma Debata ni Israel. Gabe lea ma goar ni Jahowa di adopan ni angka bangso. Tutu do tahe na talu Jahowa?

Ayat 22-24 ni turpukta on tangkas manulak pangantusion sisongon i. Molo tung pe diloas Jahowa bangso Israel tarbuang tu Babel ndada ala na talu Jahowa maralohon debata ni Babel, alai na Jahowa do masa i songon uhuman tu bangso Israel naung manimbil sian Jahowa. I do umbahen disurathon di ayat 24, na ingkon boanon ni Jahowa do bangso Israel mulak tu Jerusalem sian habuangan Babel. Ndang pasombuon ni Jahowa nasida hot di habuangan ai i do dalan paulakhon habadiaon ni goar ni Jahowa naung sanga ramun ala diramuni bangso Israel marlute na manomba debata na asing jala ala na tarbuang nasida tu Babel. Diondolhon di ayat 22, "Ndada ala hamu Ahu mambahen songoni, ale pinompar ni Israel, ala ni goarHur badia i do,... Tujuan akhir pambahenan ni Jahowa mamboan Ta bangso Israel sian habuangan Babel ndada holan asa mulak nasida tu tano Israel alai laho paulakhon habadiaon dohot hatimbulon ni goar ni Tuhan Jahowa naung sanga ramun jala marlea do.

Lam diondolhon do tujuan on di ayat 23, "Jala Ahu ma pabadiahon goarHu na timbul i, naung niramunan di tongatonga ni angka bangso parbegu, na niramunanmuna tahe di tongatonganasida, asa tung ditanda angka bangso parbegu. Ahu do Jahowa, ninna Tuhan Jahowa, ia dung Huparbadia diringku di bagasan hamu di adopanmuna" Sian ayat 23 on tangkas taantusi marhite hamumulak ni bangso Israel gabe patar ma tu angka bangso parbegu na so talu Jahowa, gabe patar ma goar nang huasoÑa Angka naung sanga mandok naung talu Jahowa ala tarbuang Israel tu Babel, nuaeng marnida jala mangantusi ndang talu hape Jahowa Hamumulak ni bangso Israel papatarhon (bukti nyata) habadiaon dohot hatimbulon ni Debata Jahowa.

Ayat 25-27: Debata mangalehon roha nang tondi na imbaru tu bangso Israel

Molo dung diboan bangso Israel mulak sian habuangan, ndang dos be nasida songon tingki na salpu Tarbuang nasida ala manimbil sian dalan ni Jahowa, ala ni asa unang be masa na songon i, jumolo ma diuras Jahowa nasida sian haramunon jala sian ganaganaannasida i. Nunga ias be nasida diuras Debata Alai ndang sae holan diuras, ingkon gabe jolma na imbaru do nasida. Boha ma masa i?

Dilehon Jahowa ma tu nasida roha nang tondi na imbaru, i ma roha sibuk ala na sailaonna i roha batu do nasida. Roha batu i ma roha na mangalo tu Hata ni Jahowa marhite manomba debata na asing, marhite ulaon na jat, nang marhite ragam ni  pangarupaon. Unsaton ni Jahowa ma roha batu i jala digantihon dohot roha sibuk, i ma roha na mangoloi Jahowa. Roha sibuk i ma roha na diamudihon Tondi ni Jahowa jala ulaonna mangulahon Hata ni Jahowa. Tondi ni Debata dilehon tu bagasan ateate ni bangso Israel asa Tondi i ma na mambahen roha nasida gabe roha sibuk, na manghorhon parange na hombar tu Hata ni Debata. Mangulahon Hata ni Debata ndang be holan sian hadirion ni bangso i, ndang mangasahon hagogoon ni jolma ala gagal do molo songon naung nialaman ni bangso Israel pola sahat tu na tarbuang nasida langgo nuaeng, Tondi ni Debata do na patauhon bangso i laho mangulahon Patik ni Debata.

 

III. HAHONAAN NI JAMITA /POKOK-POKOK SIJAMITAHONONHON

 1. Debata Pabadiahon GoarNa

Songon na hurang tabo do begeon pandohan. "Tuhan tidak perlu dibela oleh pengikutNya" alai i do sintongna songon na taida di turpuk jamita on Sanga "hira" na ramun goar ni Jahowa di adopan ni angka bangso ala ni dosa ni Israel dohot ala na tarbuang nasida tu Babel alai ndang diloas Debata manongtong marlea goarNa. Debata sandiri do pabadiahon goarNa naung sanga ramun i ma marhite na mamboan bangso Israel mulak tu Jerusalem. Suang songon i do nang di partingkianta saonari. Di era digital on tung bahat do jolma na olo mangaleai ugamo (Debata) na asing, dung i terpancing ma penganut ugamo i membela Debata na pola sahat tu na mati-matian. Ujungna madabu ma nasida tu perdebatan agama na jotjot marujung tu penistaan agama sahat tu na berproses hukum. Marhite turpuk sadari on diajarhon tu hita, ndang pola mati-matian hita marhite hata nang debat agama laho membela habadiaon dohot hatimbulon ni Debata. Unang be adong halak na porsea na olo terpancing berdebat agama/ ajaran tarlumobi di angka media sosial. Debata sandiri do na goarNa molo tung pe adong pabadiahon dohot patimbulhon na mangaramunisa. Tuhan tidak

perlu dibela karena la mampu dan pasti membela diriNya sendiri. Jika ada yang menista nama Tuhan, bukan kita sebagai pengikutNya yang tampil membela, tetapi Tuhan sendiri yang pasti bertindak dengan caraNya dan waktunya untuk menguduskan namaNya.

2. Debata mangalehon TondiNa asa marroha sibuk angka na porsea

Molo naeng tabela Debata, molo naeng badia goar ni Debata tabahen, turpuk on mangajarhon ndang marhite debat agama/ ajaran tarlumobi di angka media sosial Tabela ma Debata taparbadiai ma goarNa marhite parange na hombar tu Hata ni Debata. Na mambahen ramun goar ni Jahowa di turpukta ima pangalaosion ni bangso Israel sian Patik ni Debata Alani, molo so lomo rohanta marlea Debata, unang ma talaosi PatikNa Parsitutuonta mangaradoti habadiaon dohot hatimbulon n Tuhan Jahowa patar marhite parangenta si ganup ari na hombar tu Hata ni Debata. Unang be tasomba ganaganaan, unang be tahaporseai angka hagogoon ni portibi, unang be taula angka na jahat nang pangarupaon Unang be dos pangalahonta songon pangalaho ni portibi, ima na holan mangahut tu diri so marpanarihon di dongan asa unang ramun goar ni Debata ala ni hita Tontu godang do tantangan na naeng manait hita mangulahon na maralo tu lomo ni roha ni Debata na boi mambahen ramun goar ni Debata, boi sian dirinta, boi sian na humaliang, boi sian panggomgomi alai ndang jadi hita tarela tusi.

Tutu ndang tarbahen hita i ianggo sian hadirionta sandiri. Ndang tarula hita Patik ni Debata molo mangasahon gogonta, jala tangkas do i diboto Debata. Alani, dilehon Debata do tu hita TondiNa asa gabe marroha dohot martondi na imbaru hita. Taloas ma diunsat Debata roha na robi, ima na ginoaranna roha batu na manghorhon haramunon tu goar ni Jahowa. Taloas ma hita diuras Debata sian haramunonta marhite mudar ni Tuhan Jesus asa ias hita di adopan ni Debata. Songon pangurason ni Debata di bangso Israel songon i i do hita diuras silang ni Tuhanta Ndang adong dosa/ pangalaosion na padokdokhu urason ni mudar ni Jesus. Na ringkot asal ma olo hita diburi dohot mudarNa i asa bolong angka pangalaho roha batu, jala songon turpuk Epistelta, asa gabe panean hasonangan na di langit dohot tano na imbaru ma hita. Di Minggu Quasimodogeniti, na marlapatan songon posoposo na imbaru tubu na uasan di susu na tama, tajangkon ma Tondi ni Debata na mangalehon roha sibuk tu hita asa tau hita marparange hombar tu Hata ni Debata. Amen.

Ditulis Ulang dari tulisan Pdt.Dr. Rospita Siahaan dari Impola Jamita HKBP 2023