Jamita Minggu Paskah, 09 April 2023, Dipahehe Rap Dohot Jesus Kristus, Kolose 3: 1-4

Jamita Minggu Paskah, 09 April 2023

DIBANGKITKAN BERSAMA YESUS KRISTUS

 (DIPAHEHE RAP DOHOT JESUS KRISTUS)

Evangelium: KOLOSE 3: 1-4, Epistel : Psalmen 118: 14 - 21

 I. Patujolo

Tung mansai ringkot situtu do haheheon ni Jesus Kristus i, ima songon tanda jala panindangion na tutu taringot tu haporseaon di Tuhan Jesus. Ndang marlapatan hatutubu dohot hamatean ni Kristus i anggo so tutu hehe Ibana. Jala dung hehe Ibana, dipataridahon ma diriNa naung hehe i tu angka siseanNa dohot angka sisolhotNa. Tutu si tutu do Kristus i hehe jala manaek tu banua ginjang, alai torop dope na so porsea di Ibana. Hape haheheon dohot hahanaekNa tu banua ginjang ima:...”Na laho do Ahu mangarade inganan di hamu”. Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu! (Joh. 14:2-3). Diparade Debata do ngolu na saleleng ni lelengna di angka na porsea i di banua ginjang. Mansai ringkot do haporseaon taringot tu haheheon ni Kristus i. ido umbahen na apala ingkon dipataridahon Jesus diriNa dungkon hehe Ibana, gariada tahe tong dope sai adong na so porsea. Porsea di haheheon ni Jesus, namarlapatan porsea na Tuhan jala Debata do Ibana.

II. Hatorangan

1. Manjalahi na di ginjang I (ayat 1-2).

Ala/ angka dia do nanidok ni Apostel Paulus na di ginjang i Boha na so ringkot be di hita na di tano on? Hape hita mangolu di tano on dope. Molo di pangido hita manjalahi na di ginjang na nidok na mangula ulaon na tau lomo ni roha ni Debata, tapasaut ma sangkap ni Debata marhite ngolu dohot ulaonta (Mateus 6: 33). Sebalik na angka na di tano on ima angka ulaon hagiot ni portibi, na maralo tu ulaon ni Debata. Asa molo didok angka na di ginjang ima lului/jalahi hamu, marlapatan do i naeng pangkeon ta do angka na ditano on, manang na adong di hita laho pasauthon sangkap tu lomo ni roha ni Debata. Unang tapangke na adong di hita laho pasombu tagas, sangkap sangkap dohot hagiot ni portibion. Nunga di tobus Tuhanta hita, di palua sian dosa,huaso ni sibolis lumobi sian uhum hamatean alani ndang gabe sai mangadop/mangoloi tu portibion be hita. Ingkon tu Tuhanta Jesus i na ma na maringanan di banua ginjang, di siamun ni Debata.

 

 2. Taparangehon ma Parange na imbaru (Ayat 3)

Ingkon balongkon do saluhut angka jolma na buruk rap dohot parulaon na roa i, alai ingkon ihut do solukhononta jolma na imbaru, songon pandohan ni Apostel Paulus di 2 korintus 5:17 na mandok "Asa molo dibagasan Kristus halak, na tinompa na imbaru ma i. Nunga salpu pangalaho na robi, gabe na imbaru. Angka pangalaho na robi i ndang sai paianon be, unang be sai mangadop tu daging, molo sai marparange tu daging hita, mate ma. Alai molo ta pamate ulaon ni pamatang marhite tondi mangolu ma hita (Roma 6:6;8:12-13; Efesus 4: 22-24). Dung dibunu, balongkononta ma muse ima rimas,muruk,hajahaton, panginsahion dohot hata barangsi ro di pangalaho na marsigabusan (ayat 5-8; Roma 6:2).

 

3. Na mardalan do hita di portibion alai hubut paimahon hasangaponna (ayat 4).

Nunga mangolu hita nuaeng di bagasan haheheon ni Tuhanta Jesus Kristus. Ta parhatopot do nunga mate, nunga hehe, jala manaek Tuhanta Jesus Kristus tu banua ginjang jala hundul do nuaeng Ibana di siamun ni Debata Ama i. Tahaporsea i do nunga mate hita di bagasan hamatean na i, jala nunga hehe hita dibagasan haheheon na i jala hubut nunga di panaek hita marhitehite hananaek na i. Ala nii si ingoton ni Rohanta na gabe kontrol ni ngolunta on holan sian banua ginjang do, i ma Jesus naung hehe i. Molo manaek Tuhanta Jesus tu banua ginjang berarti ndada ditadingkon boti hita di hasiangan on. Alai na mandok/pabotohon do i tu hita ia Tuhanta Jesus nunga morot jala humusor ibana sian pangalaho hajolmaonNa mulak tu hamuliaonNa (dari kemanusiaanNya Kembali ke IlahianNya).

 III.Panimpuli

            Sian tingki tu tingki, sada ulaon ni angka siihuthon Jesus do portibion ima manghatindanghon haheheon ni Jesus Kristus sian hamatean, ai haheheon ni Kristus i do ojahan ni haporseaonta di Ibana. Ndang holan hamamateNa di hau pinorsilang na manobus dosa ni angka pardosa na porsea di Ibana na gabe sintuhu ni panindangion ni angka siihutho Jesus, songoni nang angka ulaonNa na gok tanda halongangan i manang angka pangajarionNa i na gabe ojahan ni haporseaon nang parange ni halak Kristen, alai dohot do haheheonNa na manaluhon hamatean hinorhon ni dosa i, tarlumobi ala haheheonNa i do buha baju ni haheheonta di ari parpudi. Haporseaon di haheheon ni Jesus dohot di haheheonta sogot i do na gabe ojahan di hita mandalanhon ngolunta na satongkin di portibi on nuaeng on dibagasan panghirimon na togu dohot dibagasan habadiaon, sai hobas manghobasi hajolmaon marhite angka ulaon na denggan na marragam i, angka ulaon na uli, ulaon napangoluhon, patupa las ni roha di donganta jolma nang tu saluhut angka na tinompa ni Debata. Huaso haheheon ni Kristus manaluhon hamatean i, gabe dapotan hangoluan ma nang angka na porsea di hahehehonNa i. haheheon ni Kristus i margogoihon hita mandalani hangoluan jala mangalehon panghirimon di ngolu na saleleng ni lelengna di banua ginjang i.  Amen