Jamita Minggu Palmarum, 02 April 2023. |HOSIANNA! MARKUS 11: 1 - 11

Jamita tu Minggu Palmarum, Tanggal 2 April 2023

HOSIANNA!

Evangelium: Markus 11: 1 - 11

 I. Patujolo

Dibongoti Jesus do huta Jerusalem raphon dohot angka siseanNa mamolus huta Betpage dohot Betania na di lambung di dolok Jetun Somal do angka paisolat mamolus Betania marhite Kidron laho bongot tu Jerusalem. Boi dohonon dalan na ribur do dalan na binolus ni Jesus dohot angka siseanNa. Marudur do nasida naeng parsidohot di ulaon na balga, na somal dipestahon halak Jahudi di Jerusalem ima ari raya Paiashon Bagas Joro. Marroan do natorop sian desa na ualu laho parsıdohot di ulaon. Mansai ribur situtu do pesta i, songon na digom-barhon si

Markus di turpukta on. Boi do dohonon mamungka sian bindu 11, lam jotjot ma Jesus manghobasi di Jerusalem. Boi do idaonta on sahat tu bindu 16.  Jerusalem ima songon sada huta na gabe pamusatan ni angka ulaon na dipatupa halak Jahudi. Di si do dipajongjong bagas joro na umbalga, jala di si do inganan parpunguan ni angka sintua dohot malim ni halak Jahudi.

 II. Panorangion

Andorang so masuk dope tu Jerusalem disuru Jesus ma dua halak sian siseanNa asa laho tu sosor na di jolonasida Disuru do nasida mamboan sada anak ni halode na so dung dope dihunduli, tambat di topi ni dalan. Didok Jesus asa diharhari nasida tali i asa malua jala diboan tu Jesus. Ninna Jesus, molo adong na mandok: "na marhua do hamu?" Alusi hamu ma: "na ringkot di Tuhan i, jala tibu do pasuangonnasida i!" Hea do kan hita disuru sasahalak songon i, disuru amongta manang inongta laho tu jabu ni sasahalak, jala molo tasungkun laho marhua, ninna ma: "dok ma na ditonahon inong nantoan tu hamu!" Ndang apala taboto aha lapatanna, alai manigor laho do hita di bagasan pos ni roha. Songon i do nang siseanNa na dua halak i, dung sun Jesus manghatai manigor laho do nasida tu sosor na di jolonasida i ma huta Betpage. Ndang pola adong sungkunsungkun nasida jala ndang pola dialo nasida hata ni Tuhan i. Dung sahat di sosor i, dapot nasida ma anak ni halode i, tambat dingkan harbangan ni alaman i. Jadi diharhari nasida ma tali i, jala diboan ma tu Jesus. Tutu adong do na mandok "na marhua do hamu na mananggali anak ni halode i?" Dung i dialusi nasida hombar tu na nidok ni Tuhan Jesus, gabe dipasombu ma nasida.

Halode na so dung dope dihunduli i ma halode na ditonahon tu ulaon na martohonan jala na badia. Halode si songon on, ndang adong di sude inganan. Ingkon luluan do di inganan na jonok tu Jerusalem, ala disi do jotjot adong angka ulaon na martohonan dohot na badia. Disangkapi Jesus do sian daodao ni ari ingkon bongot Ibana tu Jerusalem jala ingkon boanonNa do halode naung ditonahon Ibana hian asa dipapulik. Parsihundul do Jesus di atas ni halode na so dung dope dihunduli, ala ulaon na badia do ulaon ni Jesus jala na balga situtu, ima laho mamparbadia bagas joro, jala Jesus ima Tuhan na badia, na bongot tu huta Jerusalem laho mamboan hadameon dohot las ni roha. Taingot do sada bagabaga taringot tu haroro ni Mesias di Sakaria 9:9 na ingkon ro marsihundul di atas ni halode. Taingot do nang halode na tambat di hau anggur (1 Musa 49:8-11). Molo diharhari halode na tambat i marhite parsuruon ni Jesus, na marlapatan do i, tu haluaon dohot hangoluan di bagasan Tuhan Jesus Kristus. Ibana do Mesias i na pasauthon na dibagabagahon panurirang i.

Ro do Jesus mambongoti Jerusalem parsihundul di atas ni halode raphon dohot angka siseanNa na tongtong satia mangihuthon Ibana. Jala torop do halak na pahembanghon ulosnasida tu dalan, na deba manallihi bulung rata sian ladang i laho mangamparhon tu dalan i Boi do nuaeng tahilala molo di si hita? Mansai ribur ma antong. Disi torop do na majouhon: Hosianna! Pinuji ma na ro marhitehite goar ni Tuhan i. Pinuji ma harajaon ni amanta Daud na naeng ro Hosianna ma di ginjang ni ginjangan!

Pahembanghon angka pahean dohot mangamparhon ranting ni hau, ima songon sada ulaon laho pasangaphon angka raja manang panurirang (band 2 Raj. 9 12-13) Jala tanda las ni roha do i laho manjanghon angka na manguluhon nasida di bagasan partondion. Dijanghon nasida do Jesus songon raja na sangap. Nang pe ulaon naung somal on di halak Jahudi laho manjanghon angka raja marhite pahean dohot ranting alai sada do panghirimon nasida, i ma anggiat ma nian ro Mesias i, raja ni hadameon, ulu balang na gogo jala na tigor. Nunga ro be Jesus anak ni si Daud na pajongjonghon harajaonNa di bagasan holong dohot dame. Ro do ibana laho mamparrohahon tangkas saluhut angka ulaon di bagas joro i. Dung i idaonta ma di angka bindu na mangihut songon dia Jesus paiashon bagas joro dohot paturehon nasa ulaon na hombar tu lomo ni roha ni Debata di bagas joro (ida: 13:1-3). Hundul do Jesus di bagas joro raphon dohot angka na badia, ai na badia do Ibana jala Ibana do Mesias na dipaimaima halak Jahudi i (pat. Mal. 3:1-2), jala rod saleleng ni lelengna do harajaonNa (Sak. 14 1-9; Hes. 43:2 9).

Hosianna! Lapatanna ima "sai palua ma hami!" Diendehon do ende Hosianna laho mangido tu Debata asa ro ma Debata paluahon nasida marhite haroro ni raja sipalua, siboan dame ma Mesias. Dipasahat nasida do pujipujian tu Debata dohot pasupasu tu natorop i, huhut didok dipasupasu ma na ro di bagasan goar ni Tuhan i, pinuji ma harajaon ni amanta Daud na naeng ro! Manghirim do nasida di haroro ni Mesias alai ndang ditanda nasida Jesus na ro songon Mesias, ala ditagam nasida do na ingkon ro Mesias i songon raja na hundul di atas ni hoda dohot pahean na uli jala na arga. Ndang ditagam nasida Mesias i nunga ro di tongatonga nasida marhite halode, na ro laho monang maralohon hamatean jala pajongjonghon harajaon ni Debata ro di saleleng ni lelengna.

 III. Hahonaanna ni turpuk tu ngolu sisaonnari

Na parjolo, i ma maniru ulaon ni sisean na sai mangihuthon Jesus di bagasan unduk ni roha dohot pangoloion Disuru do nasida tu huta Betpage laho mambuat halode na tambat di si, jala di bagasan pangoloion dohot pos ni roha di hata ni Jesus manigor borhat do nasida. Mangulahon ulaon na sinuru ni Debata. I do ulaonta songon siihuthon Kristus manang halak Kristen. Ingkon pos do rohanta di patik ni Debata, jala molo denggan taula gabe pasupasu ma hita di angka ulaon na mangihut muse na dipalumehon tu hita. Tabege do patik, tatangihon do jamita, tajaha do Bibel alai humurang do hita mangulahon i. Ringgas ma hata mangarataratai hata dohot patik ni Debata asa lam taantusi dalan hangoluan na pinatupaÑa di portibi on. Taula ma di bagasan haporseaon dohot pos ni roha Gabe sitindangi ni Debata ma hita, angka siseanNa, marhite hata, dohot pambahenan.

Na paduahon:  i ma pujipujian tu Debata Tapestahon do haluaonta sian dosa ganup ari Minggu marhite parpunguan di bagas joro Ro do hita marpahean na uli, jala uli do nang rupanta Sungkunsungkun, dung sahat tu bagas joro aha do bahen manjanghon Tuhan 1? Marhite roha na ias dohot pelean na hushus, ido paheanta mandapothon Tuhan i, asa denggan ma pamujionta, hibul ma rohanta jala unang be nian mardua ha hita molo nunga sahat di bagas joro ni Debata. Songon i do nang di bagasta be, ingkon marlas ni roha do hita jala rade patupahon angka parpunguan raphon dohot keluarga laho mamuji pasangaphon Debata Ingkon barani do hita mamangke tingkinta marsaor di bagasan pujipujian dohot hata ni Debata. Unang ma gumodang tingkinta di media sosial, gabe humurang di adopan ni Debata Pangido ma pangarajaion diri dohot pangoloion asa boi gumodang tingki manghobasi ulaon na hinalomohon Debata.

Na patoluhon, i ma asa tajanghon ma raja dame, ulubalang na tigor jala na gogo, ai ro di saleleng ni lelengna do harajaon-Na i ma harajaon banua ginjang. Tapangido ma asa dilehon tu hita haluaon i, ima na dipatupa marhite mudar ni Tuhan Jesus. Parsidohot ma hita gabe siboan dame, unang olo gabe pamolamola lumobi di huria i Ai martua ma siboan dame ai goaron do nasida gabe anak ni Debata. Tabahen ma bagas joro songon bagas na badia, unang adong nian ulaon na ramun dohot ulaon dosa di si. Angkup ni i, pamatangta on bagas joro ni Debata do, tapaias ma marhite panobusion naung dipatupa di bagasan Jesus Kristus, marhite na sai tongtong marroha pangoloion dohot pos ni roha. Amen.

: