Jamita Minggu Misericordias Domini, 23 April 2023, Mangulahi Tubu Di Bagasan Hata Ni Debata, 1 Petrus 1: 17 - 23.

Jamita Minggu Misericordias Domini, 23 April 2023

Dipaimbaru Asa Mangolu Dibagasan Sangkap Ni Debata

(Mangulahi Tubu Di Bagasan Hata Ni Debata)

Evangelium: 1 Petrus 1: 17 - 23

 I. Patujolo

Hira ganup do hita mananda boni (spora), isarana boni ni eme manang angka suansuanan na asing. Idaon do i sipata mansai metmet situtu alai molo dungkon disuan jala tubu mansai balga situtu pamatangna jala marlompit ganda nang parbuena, deba boi doi sahat tu marratus hali lompit ganda bilanganna. Jala deba sian ragam ni angka boni i ingkon jolo mamolus hamatean do asa tubu mangulahi, dung i magodang, marparbue jala marlompit ganda ma parbuena. Alai nang pe songon i, hira sude do angka boni i mura situtu sega, lapuhon, metep ro di na mate andorang so disaburhon. Jala na deba nari dung tubu pe boni i, tongtong do mura melos, mura panahiton, lan angka na mate Alai marasing situtu do molo boni na manubuhon hita mangulahi tubu na di bagasan turpuk on, i ma na ginoaranna boni na so olo basebasean, manang na so olo lapuhon. Boi do malos asing sahat tu na duhutduhut i jala marurus bungabunga, "alai na mian do ro di salelenglelengna boni na manongtong i, i ma hata ni Tuhan na mangolu i

 II. Hatorangan ni Jamita.

Boasa disungguli Apostel Petrus taringot tu ngolu na mangulahi tubu on tu angka paisolat naung tarpillit, na marserak di Pontus, Galatia, Kappadosia, Asia dohot Bitinia hatiha i? Adong dua sialaina, na parjolo, i ma na mardomu tu ngolu habadiaon. Asa sian ngolu na mangulahi tubu on ma ganup angka na tarpilliti tangkas mamongoti ngolu habadiaon di bagasan Debata. Songon na ginorahonna di bindu 1: 16, "badia ma hamu, ai na badia do Ahu!"

Na paduahon, i ma na mardomu tu hasadaon ni roha dohot holong maradophon dongan. On ma sada sian hatorangan ni Apostel Petrus laho patuduhon hasadaon ni angka na porsea di Debata Sisada Ama, jala tubu sian boni na sarupa, asa lam mangolu angka na porsea di bagasan holong na marsihaho- longan, asa songon na nidokna di bindu 3:8 "angkup ni i, saroha ma hamu saluhutna, sapanghilalaan, angka na marholong ni di dongan, na marasi ni roha, na serep!".

Ala ni ma dibuhat Apostel Petrus ayat 17 on dohot pandohan, "molo Ama digoar hamu Ibana, na so marnida rupa, manguhumi nasa jolma marguru tu pambahenanNa, laho marhatahuton ma hamu marparange di tingki paisolatan- muna!" Nasa halak na porsea i mian di bagasan sada hadomuan na so tarsirang, songon hadomuan ni ama tu ianakhon.Hadomuan na tubu sian sandok holong ni roha, holong ni ama tu ianakhonna, songon i nang ianakhon tu amana sandiri, gabe sumisi ma nang angka biar dohot ganggu ni roha.

Ala Ama Tuhan i di angka ianakhonNa tontu ndang pasombuonNa mago angka ianakhonNa. Jala molo muruk pe Ibana, rodi na madabu uhum sian Ibana tu angka anakhonNa, rajuman tanda ni holong na tutu sian Ibana. Alani molo diuhumi Debata hita tanda ni holongNa do i. Alai dos ma nang hita, songon ianakhonNa hita, ganda ma biar ni rohanta mida Ibana, na so jadi bahenonta na mangarsahi rohaNa manang na maralo tu lomo ni rohaNa. Ingkon tongtong do di bagasan roha na marhatahuton hita marparange, ndang mangolu saguru tu lomo ni rohanta sandiri.

Domu tusi ma nang unang neang rohanta uju di pinsangpinsang ni Jahowa jala unang manigor mandele hita molo dipinsang Jahowa hita. Ai diparmudu Debata do hita songon sada natoras na marmudumudu angka anakhonna.

Digoari Apostel Paulus do angka na porsea na tinopot ni surat on songon paisolat, jala dohot do nang hita margoar paisolat di portibi on atik pe maringan di hutanta be hita, nang di bona pasogitta, hot do hita ganup songon paisolat. Ala na maisolat do hita di hasiangan on paima bongot hita tu surgo hasonangan i. Ala ni na naeng dohonon ni Apostel Petrus unang sai holan tu portibi si nuaeng panatapta dohot ma nang tu ngolu na ro sogot Unang holan di dia hita mian si nuaeng, alai dohot do nang tu dia hita sogot. Ai uju ndang dirajumi si Lot be dirina songon paisolat, disi ma agoan ibana di saluhutna, gabe suman ni timus ma sude na niomona i saleleng di ngoluna, songon i do nang si Hawa, uju ndang dirajumi be dirina na maisolat agoan ma ibana di sandok porlak i.

Dipabotohon Apostel Petrus do di surat on hinaarga ni haluan na pinatupa ni Kristus. I ma na parjolo, saleleng so ditobus Kristus, sandok ngolu i mardalan dompak hamagoan. Ndan marniula, siasia, ndang adong na tinujuna, gabe marisuang, tha ngolu i ia so tinobus ni Kristus. Ala ni asa marguna situtu d haluaon na pinatupa ni Kristus i, ingkon tinggalhonon do ngplu na buruk. Jala ndang tuk sere manang perak manuhor tondi i jolma i (ay. 18). Nang angka na dirajumi mansai mararga situtu di hatiha i ima sere dohot perak, ndang sadia i martimbanghon mudar ni Kristus na arga i, na songon mudar ni birubiru na so hasurahan, na so marlindang (ay 19).

Na paduahon, andorang so madabu dope jolma i tu bagasan dosa, nunga ditodo Debata hian Kristus paradehon haluaon tu hangoluan i (ay 20). Paluahon jolma i sian hamagoan. Ala nii, ndada hinorhon ni dosa umbahen na gabe adong Kristus, nunga ojak hian Ibana andorang so adong dope portibi on. Alai didok papataronNa ma Ibana di ujung ni angka tingki Laho patuduhon na diparade Debata dope na umbalga di angka paisolat na olo mangolu di bagasan habadiaon dohot Debata,

Na patoluhon, diuduti ma laho patutoguhon haporseaon ni nasida marhite hatorangan na mardomu tu haheheonNa sian angka na mate. Asa togu marojahan haporseaon nasida i di bagasan Kristus. Ndang tuk hita porsea tu Debata ia so marhite Kristus. Holan Kristus do na tuk pasonanghon rohanta, gabe talup ma hita ro jala porsea tu Debata (ay. 21).

Dungi diondolhon Apostel Petrus ma dua pangalaho na mansai ampit tu ngolu na mangulahi tubu on (ay. 22), Na parjolo, i ma paiashon roha jala marpangoloion di hasintongan. Ndang na mandok haluaon i marojahon tu pambahenan, alai nda tung so marparbue haporseaon na sintong manang haporseaon na paluahon i. Domu tu si ma jumpang hita, ia hata pangoloi' (taat) na di bagasan turpuk on tudos do i tu lapatan ni hata 'porsea manang manghaporseai' Debata

Paduahon, mangeahi haholongan na so marlaok di dongan (philadelphia). Haholongan na so berpura-pura, holong na marsitutu. Godang do halak manghaholongi alai holan diduru, holan di pamangan alai ndang sian nasa roha. Jala adong do halak na marholong ni roha holan ala ni laho na mangadu pangomoan tu dirina sandiri. Ala ni i hea didok sahalak reformator na margoar si Calvin, ndang adong na ummaol sian na manghaholongi dongan sian nasa roha. Ala holong na tubu sian dirinta sandiri sai olo do marlaok sipalensem, mangait tu diri, ndang sian nasa roha. Alani disurathon Apostel Petrus ma hata manghaholongi sian nasa roha on dohot hata 'agapeste', morot ibana sian hata philia tu hata agape. Nang pe manghaholongi dongan alai ingkon do holong sian nasa roha na sian Debata. Ala ni ngolu na mangulahi tubu i manogu hita ndada holan tu ngolu na mian di bagasan habadiaon alai dohot do nang tu ngolu na marpanarihon, na manghaholongi dongan sian nasa roha.

III. Panutup

Molo di surat Jakobus digoari Hata i songon sorminan, manang di surat Heber 4: 12 didok Hata i tumajom sian podang sidua baba, tuk manirang hosa dohot daging. Alai molo diturpuk on digombarhon ma Hata na mangolu i tuk mangalehon dohot manubuhon ngolu na imbaru. Disi ma hita mangulahi tubu, asa di bagasan haluaon i, mian ma hita di bagasan ngolu habadiaon, jala marsihaholongan hita sama hita. Amen.

Ditulis/disunting dari tulisan Pdt.Dr.Sukanto Limbong, dalam tulisan Impola ni Jamita HKBP tahun 2023.